ՀՀ արդարադատության նախարարի 2022 թվականի մարտի 24-ի թիվ 129-Ա հրամանով «Իրավական նախաձեռնությունների կենտրոն» իրավապաշտպան հասարակական կազմակերպությունն ընդգրկվել է ՀՀ քրեակատարողական օրենսգրքի նախագծի լրամշակման աշխատանքների խորհրդատվական խմբում:
Խորհրդատվական խմբի գործունեությունը ներառում է օրենսգրքի լրամշակման աշխատանքները, դրա առանձին դրույթների վերաբերյալ առաջարկությունների ուսումնասիրությունը և ըստ անհրաժեշտության նախագծում փոփոխություններ կամ լրացումներ կատարելու անհրաժեշտության և նպատակահարմարության քննարկումը:
Հայաստանում քրեական արդարադատության համակարգում հիմնարար բարեփոխումների նոր փուլի սկիզբը դրվեց վերջին ժամանակների հասարակական, քաղաքական և իրավական զարգացումներով:
Մասնավորապես, 2021 թվականի մայիսի 5-ին և հունիսի 30-ին ընդունվեցին ՀՀ քրեական և քրեական դատավարության օրենսգրքերը, ինչի տրամաբանական շարունակությունը ՀՀ քրեակատարողական նոր օրենսգրքի ընդունումն է:
Նշենք, որ նոր օրենսգիրքը լրամշակվել և ուղարկվել է շրջանառության, իսկ 2022 թվականի ապրիլի 4-ին ներկայացվել է ՀՀ վարչապետի աշխատակազմ:
