ՀՀ արդարադատության նախարարի 2024 թվականի օգոստոսի 20-ի թիվ 507-Ա հրամանի համաձայն՝ «Իրավական նախաձեռնությունների կենտրոն» ՀԿ-ի նախագահ Նարե Հովհաննիսյանն ընդգրկվել է քրեակատարողական ծառայողների ատեստավորման հանձնաժողովում։
Ատեստավորման կարգը սահմանվել է ՀՀ կառավարության 2024 թվականի մայիսի 2-ի թիվ 649-Ն որոշմամբ, որի համաձայն կարգավորվում են քրեակատարողական ծառայության գլխավոր, առաջատար, միջին և կրտսեր խմբերի ծառայողների համար հավելավճար հաշվարկելու կամ հավելավճարի հաշվարկումը շարունակելու նպատակով ատեստավորման կազմակերպման և իրականացման հետ կապված հարաբերությունները:
Ատեստավորման շրջանակներում ստուգվում են ծառայողների ֆիզիկական պատրաստականության աստիճանը, ընդհանուր զարգացվածությունը, մասնագիտական գիտելիքների իմացությունը:
Ատեստավորման հանձնաժողովի նախագահը համապատասխան ոլորտը համակարգող նախարարի տեղակալն է: Հանձնաժողովը կազմված է 7 հիմնական անդամից․
- ՀՀ վարչապետի 1 ներկայացուցիչ (համաձայնությամբ),
- հասարակական կազմակերպության 1 ներկայացուցիչ (համաձայնությամբ),
- Արդարադատության նախարարության 2 ներկայացուցիչ,
- Քրեակատարողական ծառայության 3 ներկայացուցիչ։
Բացի հիմնական անդամներից, հանձնաժողովի կազմում ընդգրկվել են նաև ստուգարքի փուլի կազմակերպման և անցկացման համար համապատասխան ոլորտի 3 մասնագետ և թեստավորման փուլի կազմակերպման և իրականացման համար համապատասխան ոլորտի 3 մասնագետ։
