Իրավական նախաձեռնությունների կենտրոնը 2025 թվականի հունվարի 23-ին դիմել է ՀՀ գլխավոր դատախազությանը՝ խնդրելով տեղեկատվություն տրամադրել հետևյալի մասին․
- Ենթադրյալ խոշտանգման կամ վատ վերաբերմունքի այլ դրսևորման վերաբերյալ քրեակատարողական հիմնարկներից 2024 թվականի ընթացքում քանի՞ արձանագրություն է ստացվել ՀՀ գլխավոր դատախազություն։ Ստացված արձանագրությունների հիման վրա քրեական քանի՞ գործ է հարուցվել, և դրա արդյունքում խոշտանգման կամ վատ վերաբերմունքի այլ դրսևորման քանի՞ դեպք է հաստատվել՝ ըստ մեղադրական դատավճռի։
- 2024 թվականի ընթացքում ՀՀ քրեական օրենսգրքի 322, 323, 324 և 325 հոդվածներից յուրաքանչյուրով քանի՞ քրեական գործ է հարուցվել, քանի՞ մեղադրական դատավճիռ է կայացվել։
- Քրեակատարողական հիմնարկներում ազատազրկված անձանց շրջանում 2024 թվականի ընթացքում արձանագրված մահվան դեպքերից քանիսի՞ առթիվ է քրեական գործ հարուցվել, քանի՞ մեղադրական դատավճիռ է կայացվել։ Եղե՞լ են դեպքեր, երբ քրեական պատասխանատվության են ենթարկվել քրեակատարողական ծառայողները/աշխատակիցները, «Քրեակատարողական բժշկության կենտրոնի» բուժաշխատողները։
- 2024 թվականի ընթացքում քրեակատարողական հիմնարկներում տրամադրվող սնունդը դատախազության կողմից արդյո՞ք ենթարկվել է փորձաքննության, թե՞՝ ոչ։ Եթե՝ այո, ապա խնդրում եմ նշել քրեակատարողական հիմնարկները, փորձաքննության ենթարկված սննդի տեսակները և տրամադրել փորձաքննության արդյունքները։
- 2024 թվականի ընթացքում դատապարտյալների անվտանգության գոտու փոխփոխության վերաբերյալ դատախազության կողմից քանի՞ միջնորդություն է ներկայացվել քրեակատարողական ծառայության կենտրոնական մարմնում գործող տեղաբաշխման հանձնաժողովին։
- 2024 թվականի ընթացքում դատապարտյալների անվտանգության գոտու փոխփոխության վերաբերյալ որոշումներից քանիսի՞ վերաբերյալ է դատախազության կողմից կասեցման միջնորդություն ներկայացվել։ Դատախազության միջնորդություններից քանի՞սն են բավարարվել, քանի՞սը՝ մերժվել։
- 2024 թվականի ընթացքում դատախազության կողմից քանի՞ միջնորդություն է ներկայացվել քրեակատարողական հիմնարկների պետերին՝ ազատազրկված անձանց նկատմամբ ներքին կանոնակարգով սահմանված պատիժը կրելու կարգի և պայմանների խախտման համար կարգապահական տույժ կիրառելու վերաբերյալ, քանի՞սն են մերժվել, քանի՞սն են բավարարվել։
- Ազատազրկված անձանց նկատմամբ 2024 թվականի ընթացքում քրեակատարողական հիմնարկների ներքին կանոնակարգով սահմանված պատիժը կրելու կարգի և պայմանների խախտման համար կիրառված կարգապահական տույժերից քանիսի՞ վերաբերյալ է դատախազության կողմից միջնորդություն ներկայացվել դրանք կասեցնելու և վերանայելու պահանջով, դատախազության միջնորդություններից քանի՞սն են մերժվել, քանի՞սն են բավարարվել։
- 2024 թվականի ընթացքում դատախազության կողմից քանի՞ միջնորդություն է ներկայացվել ազատազրկված անձանց խրախուսանքի միջոց կիրառելու վերաբերյալ, քանի՞սն են մերժվել, քանի՞սն են բավարարվել։
- Ի՞նչ քայլեր են ձեռնարկում պատիժների և հարկադրանքի այլ միջոցների կիրառման օրինականության նկատմամբ հսկողության վարչության դատախազներն այն դեպքում, երբ արձանագրում են, որ քրեակատարողական հիմնարկի վարչակազմը խրախուսանք չի տրամադրում այն դատապարտյալներին, ովքեր դրական վարքագիծ են դրսևորում, ուսման և աշխատանքի վերաբերյալ դրական վերաբերմունք ունեն։
- 2024 թվականի ընթացքում ազատազրկված անձանց նկատմամբ կիրառված խրախուսանքի միջոցներից քանիսի՞ վերաբերյալ է դատախազության կողմից միջնորդություն ներկայացվել դրանք կասեցնելու և վերանայելու պահանջով, դատախազության միջնորդություններից քանի՞սն են մերժվել, քանի՞սն են բավարարվել։
- Ազատազրկված անձանց արգելված իրերի փոխանցման դեպքերի առթիվ 2024 թվականի ընթացքում քանի՞ քրեական գործ է հարուցվել։ Դրանց արդյունքում քանի՞ մեղադրական դատավճիռ է կայացվել։ Եղե՞լ են դեպքեր, երբ քրեական պատասխանատվության են ենթարկվել քրեակատարողական ծառայողները/աշխատակիցները, «Քրեակատարողական բժշկության կենտրոնի» բուժաշխատողները։
- 2024 թվականի ընթացքում դատախազության կողմից պայմանական վաղաժամկետ ազատման վերաբերյալ քանի՞ որոշում է բողոքարկվել դատախազության կողմից, դրանցից քանի՞սն են մերժվել, քանի՞սն են բավարարվել, և դրանց բավարարման արդյունքում քանի՞ անձ է հետ վերադարձվել քրեակատարողական հիմնարկ։
2025 թվականի հունվարի 17-ին պատասխան է ստացվել առ այն, որ գրության մեջ նշված հարցերի վերաբերյալ ամփոփված տեղեկատվություն դատախազությունում դեռևս առկա չէ։ Սակայն ստացված պատասխանը Կազմակերպությունը հիմնավոր չի համարում և կարծում է, որ այդպիսով պահանջվող տեղեկատվությունը տրամադրելուց խուսափելու փորձ է արվում։
Հարկ է նշել, որ ըստ «Տեղեկատվության ազատության մասին» ՀՀ օրենքի 9-րդ հոդվածի 7-րդ մասի 3-րդ կետի՝ եթե գրավոր հարցման մեջ նշված տեղեկությունը տրամադրելու համար անհրաժեշտ է կատարել լրացուցիչ աշխատանք, ապա այդ տեղեկությունը դիմողին է տրվում դիմումն ստանալուց հետո 30-օրյա ժամկետում, որի մասին հարցումն ստանալուց հետո 5-օրյա ժամկետում գրավոր տեղեկացվում է դիմողին՝ նշելով հետաձգման պատճառները և տեղեկությունը տրամադրելու վերջնական ժամկետը։
Հետևաբար Կազմակերպությունը կրկնակի գրություն է ուղարկել դատախազություն՝ առաջարկելով պահանջվող տեղեկատվությունը տրամադրել համապատասխան գրությունը ստանալուց հետո 30-օրյա ժամկետում։