Կարանտինային խցերը և պատժախցերը քրեակատարողական հիմնարկներում

Կարգապահական տույժեր

Ազատազրկված անձինք կալանավորման կամ պատիժը կրելու սահմանված կարգը խախտելու, իրենց պարտականությունները չկատարելու կամ ոչ պատշաճ կերպով կատարելու դեպքում կարող են ենթարկվել տույժի:

Կալանավորված անձանց նկատմամբ կիրառվող տույժի միջոցներն են.

• Նկատողության հայտարարում,
• Պատժախուց տեղափոխելը մինչև 10, իսկ անչափահասներին` մինչև 15 օր ժամկետով:

Ազատազրկման դատապարտված անձանց նկատմամբ կիրառվող տույժի միջոցներն են.

• Նկատողություն,
• Խիստ նկատողություն,
• Պատժախուց տեղափոխելը մինչև 15, իսկ անչափահաս դատապարտյալին՝ մինչև 10 օր ժամկետով:

Կարգապահական տույժի տեսակն ընտրելիս հաշվի են առնվում կատարված խախտման պայմանները, տույժի միջոցի կիրառմամբ հետապնդվող իրավաչափ նպատակին հասնելու ողջամիտ անհրաժեշտությունը, կալանավորված անձի կամ դատապարտյալի անձը, վարքը մինչև խախտում կատարելը և ընդհանուր բնութագիրը: Տրվող տույժը պետք է համապատասխանի կատարված խախտման ծանրությանը և բնույթին: Այն պետք է լինի արդարացի և կիրառվի միայն համապատասխան ուսումնասիրությունների արդյունքում ընդունված պատճառաբանված որոշման հիման վրա:

Ազատազրկված անձանց նկատմամբ տույժի միջոցները կիրառվում են հիմնարկի պետի որոշմամբ:

Տույժի միջոցի կիրառումը կարող է բողոքարկվել քրեակատարողական հիմնարկների նկատմամբ հսկողություն և վերահսկողություն իրականացնող մարմիններին, սակայն բողոքարկումը տույժի միջոցի կիրառումը չի կասեցնում:

Տույժի կիրառումը հետաձգելու ընթացքում նոր խախտում չկատարելու և դրական վարքագիծ դրսևորելու դեպքում կալանավորված անձինք կամ դատապարտյալները կարող են ազատվել տույժը կրելուց:

Պատժախցեր

Ազատազրկված անձինք կարող են պատժախուց տեղափոխվել այն դեպքում, երբ.

• Ճնշում են գործադրել այլ ազատազրկված անձանց նկատմամբ, նրանց վիրավորել են, հարձակում են գործել հիմնարկի վարչակազմի ներկայացուցչի կամ այլ անձանց վրա,
• Չեն ենթարկվել հիմնարկի վարչակազմի ներկայացուցչի օրինական պահանջներին,
• Պահել, օգտագործել և պատրաստել են արգելված առարկաներ, իրեր և սննդամթերք,
• Փչացրել են հիմնարկի գույքը:

Պատժախուց տեղափոխելը որպես տույժի միջոց կիրառվում է նաև այն ազատազրկված անձանց նկատմամբ, ովքեր նախկինում ունեցել են 2-ից ավելի կարգապահական տույժեր:

Պատժախցում գտնվելու ժամանակահատվածում կարող են արգելվել. 

• Դրամական փոխանցումներ ստանալը և կատարելը, հանձնուքներ, ծանրոցներ ու փաթեթներ ստանալը և ուղարկելը՝ բացառությամբ առաջին անհրաժեշտության առարկաներ ձեռք բերելու դեպքերի,
• Քաղաքացիաիրավական գործարքներին մասնակցելը,
• Տեսակցությունները՝ բացառությամբ օրենքով նախատեսված դեպքերի,
• Հեռախոսակապից օգտվելը:

Պատժախցում գտնվելու ժամանակամիջոցում ազատազրկված անձանց արգելվում է աշխատելը:

Սակայն նրանց նկատմամբ օրենքով սահմանված սահմանափակումներից բացի այլ սահմանափակումներ կիրառելն արգելվում է:

Ազատազրկված անձինք պատժախցում կարող են պահվել միայնակ: Այնտեղ գտնվելու ընթացքում նրանք միայն քնի համար սահմանված ժամերին ապահովվում են անհատական քնելու տեղով:

Նրանք նաև օգտվում են ամենօրյա` 1 ժամ տևողությամբ զբոսանքի իրավունքից և ապահովվում են իրենց սեռին, տարվա եղանակի կլիմայական պայմաններին համապատասխանող նախատեսված միասնական նմուշի հանդերձանքով:

Պատժախուցը մաքրվում է այնտեղ գտնվող կալանավորված անձի կամ դատապարտյալի կողմից:

Բժշկական սպասարկման համապատասխան ծառայողը և պատասխանատու հերթապահն ամեն օր այցելում են պատժախցում պահվող անձանց:

Հիմնարկի պետը, հաշվի առնելով հիվանդության հետ կապված պատժախցում գտնվելու անթույլատրելիության վերաբերյալ բժշկի եզրակացությունը, իրավունք ունի հետաձգելու պատժախուց տեղափոխելու ձևով տույժի կիրառումը, կրճատելու այնտեղ գտնվելու ժամանակահատվածը կամ ժամկետից շուտ ազատելու տույժը կրելուց:

Հիմնարկի մանկատանը երեխա ունեցող, կերակրող մայր, հղի, նախածննդյան կամ հետծննդյան ժամանակահատվածում գտնվող ազատազրկված անձինք պատժախուց չի տեղափոխվում։