Այսօր ուսանողների միջազգային օրն է, ուստի շնորհավորում ենք նաև բոլոր դատապարտյալ ուսանողներին և մաղթում հաջողություններ գիտելիքի ասպարեզում։
Կրթությունը շատ կարևոր է դատապարտյալների համար և կօգնի նրանց հետագայում գտնել իրենց տեղը կյանքում։
Հիշեցնենք, որ Հայաստանի անկախացումից ի վեր քրեակատարողական հիմնարկներում բարձրագույն կրթություն է ստացել ընդամենը 11 դատապարտյալ։ Նրանցից չորսը եղել են ցմահ ազատազրկման դատապարտված, մյուսները՝ առանձնապես ծանր, ծանր և միջին ծանրության հանցագործություն կատարած անձինք։
Սահմանադրության 38-րդ հոդվածը սահմանում է, որ յուրաքանչյուր ոք ունի կրթության իրավունք։ Քրեակատարողական օրենսգրքի 89-րդ հոդվածի 1-ին կետն էլ ուղղիչ հիմնարկի վարչակազմին պարտավորեցնում է դատապարտյալի կրթությունը կազմակերպելու միջոցներ ձեռնարկել։ Սակայն կրթության իրավունքն իրացնելիս դատապարտյալները մի շարք խնդիրների են բախվում:
Իրավական նախաձեռնությունների կենտրոնը հընթացս իրականացնում է «Կրթությունը քրեակատարողական հիմնարկներում. մարտահրավերներ և հեռանկարներ» թեմայով հետազոտություն, որտեղ ուսումնասիրվելու են ազատազրկված անձանց կրթության իրավունքի իրացման օրենսդրական ու պրակտիկ խոչընդոտները և դրանց ազդեցությունն անհատական մակարդակում, մշակվելու են իրավիճակի բարելավմանն ուղղված առաջարկություններ:
Հետազոտական զեկույցը կհրապարակվի տարեվերջին։