Կառավարությունը 2025 թվականի ապրիլի 23-ին ընդունել է Հայաստանի Հանրապետությունում գենդերային քաղաքականության իրականացման 2025-2028 թվականների ռազմավարությունը և միջոցառումների ծրագիրը, ինչը կարևոր առաջընթաց է երկրում գեդերային հավասարության և կանանց իրավունքների պաշտպանության խթանման տեսանկյունից։
Գենդերային հավասարության քաղաքականության ապահովման 6 գերակայություն է սահմանվել ռազմավարությամբ․
- Կառավարման բոլոր ոլորտներում և որոշումների ընդունման մակարդակում գենդերային խտրականության հաղթահարում, կանանց առաջխաղացման ազգային մեխանիզմի կատարելագործում, կանանց և տղամարդկանց հավասար ու լիարժեք մասնակցության հնարավորությունների ապահովում և ընդլայնում
- Սոցիալ-տնտեսական բնագավառում՝ աշխատաշուկայում, տնտեսության տարբեր ճյուղերում, աշխատանքային գործունեության ձևերում գենդերազգայուն մոտեցումների խրախուսում, աշխատուժի գենդերային խզվածքի նվազեցում և աշխատանքի պաշտպանության կառուցակարգերի բարելավում
- Կրթության և գիտության ոլորտում գենդերային խտրականության հաղթահարում, կանանց և տղամարդկանց լիարժեք մասնակցության խթանում, հավասար հնարավորությունների ընդլայնում և բարենպաստ միջավայրի ամրապնդում
- Առողջապահության ոլորտում կանանց և տղամարդկանց հավասար հնարավորությունների ապահովում
- Գենդերային բռնության և խտրականության հաղթահարում, կանանց և աղջիկների նկատմամբ բռնության և ընտանիքում բռնության կանխարգելում, հաղթահարում և բռնության ենթարկված կանանց և աղջիկների պաշտպանություն և աջակցություն
- Կլիմայի փոփոխության նկատմամբ գենդերազգայուն և գենդերաարձագանքող մոտեցումների ձևավորում, ներառական սկզբունքների ապահովում և իրազեկվածության բարձրացում
Այս գերակայություններն ուղղված են նշված ոլորտներում կանանց և տղամարդկանց իրավունքների կիրարկման ու հնարավորությունների իրացման համար բարենպաստ և դրական միջավայրի ստեղծմանը՝ առաջնորդվելով նաև Հայաստանի Հանրապետության ստանձնած պարտավորություններով։
Առողջապահության ոլորտում հավասար հնարավորությունների ապահովման համատեքստում կարևորվել են նաև ազատությունից զրկված կանանց հիմնահարցերը։ Մասնավորապես, նախատեսվում է․
- Ազատությունից զրկված կանանց շրջանում ապահովել վերարտադրողական առողջության ծառայությունների հասանելիությունը՝ հակաբեղմնավորիչ միջոցների (պահպանակներ և ներարգանդային պարույրներ) անվճար տրամադրման միջոցով։
- Ազատությունից զրկված կանանց շրջանում հավասար հիմունքներով իրականացնել առողջապահական կանխարգելիչ միջոցառումներ՝ սքրինինգային ծառայություններ։
