2025 թվականի հոկտեմբերի 14-ին մասնակցել ենք Ժողովրդավարության զարգացման հիմնադրամի գրասենյակում անցկացված քննարկում-հանդիպմանը, որը վերաբերում էր Առողջության համապարփակ ապահովագրության համակարգի ձևավորմանը և դրա ազդեցությանը հանրության վրա։
ՀՀ առողջապահության նախարարության պետական առողջապահական գործակալության պետ Սամվել Խարազյանը հասարակական կազմակերպությունների ներկայացուցիչներին ներկայացրել է օրենքի լրամշակված նախագիծն ու դրա հիմնական առանձնահատկությունները։
Հանդիպման նպատակն էր համախմբել փորձը, կարծիքներն ու առաջարկները՝ նպաստելու արդար, ներառական և կայուն առողջապահական համակարգի ձևավորմանը, որտեղ յուրաքանչյուր քաղաքացի կունենա առողջության պահպանման հավասար հնարավորություն։
Քննարկման ընթացքում շոշափվել են մի շարք առանցքային թեմաներ․
- արդյունավետ և որակյալ բժշկական օգնության ապահովում,
- ներդրվող համակարգի ազդեցությունը աղքատության մակարդակի վրա,
- դեղերի տրամադրման մեխանիզմներ,
- մասնագետների վերապատրաստման անհրաժեշտություն,
- խոցելի խմբերի համար ծառայությունների հասանելիություն և մի շարք այլ կարևոր հարցեր։
Մասնակիցները համակարծիք էին, որ առողջության համապարփակ ապահովագրությունը ոչ միայն առողջապահական, այլև սոցիալական արդարության հարց է։ Նրանք ընդգծել են շարունակական համագործակցության և բաց երկխոսության կարևորությունը՝ համակարգը դարձնելու բոլորի համար հասանելի և արդար։
Հանդիպման արդյունքում պայմանավորվածություն է ձեռք բերվել շարունակել քննարկումները հասարակական կազմակերպությունների հետ՝ առողջության համապարփակ ապահովագրության վերաբերյալ հանրային իրազեկվածությունը բարձրացնելու նպատակով։
Աղբյուրը՝ Ժողովրդավարության զարգացման հիմնադրամ
